Janco & Zené

Ons Verhaal

Ons verhaal het in Januarie 2020 tydens eerstejaars-koshuisoefeninge begin. Dit was daar waar Janco dapper genoeg was om sy kans te waag en met Zené te probeer gesels, ongelukkig sonder veel sukses. Kort daarna, net voor Covid en die inperking, het ons mekaar 'n bietjie beter leer ken. Toe het die wêreld egter onverwags tot stilstand gekom, en daarmee saam ook ons geselsies.

Ongeveer 'n jaar later het ons mekaar heel toevallig weer in Potchefstroom raakgeloop. Hierdie keer was dit anders, die gesprek het maklik gevloei en dinge het sommer net natuurlik gekliek. Van daardie oomblik af het alles begin in plek val. Nie lank daarna nie het Janco vir Zené oortuig om saam met hom na sy gunsteling plek in die wêreld, Plett, te gaan om saam met sy familie te kamp, 'n gewaagde skuif wat gelukkig baie suksesvol was.

In Desember 2021 het Janco vir Zené op Robberg se staproete uitgevra. Wat gevolg het, was vier jaar vol staptogte, universiteits ervarings, baie lag, groei en 'n droomreis na Italië. Dit was juis daar, in Bellagio aan die oewer van die Comomeer, waar hy haar gevra het om met hom te trou.

Nou staan ons aan die begin van 'n nuwe hoofstuk, gereed om saam ons lewens aan te pak en die liefde en genade van ons Here Jesus elke dag uit te leef.